Ослын голомтод аврах ажиллагаанд үүрэг гүйцэтгэхээр аврагчид алсыг зорилоо Бүгд Найрамдах Турк Улс болон Сири Улсад тохиолдсон газар хөдлөлтийн үеэр олон хүний амь нас эрсдэж, байгалийн томоохон хэмжээний гамшиг тохиолдоод байгаа билээ. Гамшгийн голомтод эрэн хайх, аврах ажиллагаанд дэлхийн улс орнууд өөрийн аврах багуудыг илгээхээс гадна хүмүүнлэгийн тусламжийн цуваагаа гамшиг болсон бүс нутгуудруу илгээсээр байна. Монгол Улсын Засгийн Газраас БНТУ-д ОБЕГ-ын дэд дарга, бригадын генерал Б.Ууганбаяраар ахлуулсан Онцгой байдлын байгууллагын эрэн хайх, аврах бүлэг, Батлан хамгаалах яамнаас эмнэлгийн баг илгээх шийдвэр гарган 2023 оны 02 дугаар сарын 08-ны өдрийн 04:34 цагт Буянт ухаа нисэх буудлаас үүрэг гүйцэтгэхээр хөөрлөө. Багийн бүрэлдэхүүнд Үндэсний аврах бригадын Химийн ажиллагааны салбарын захирагч, хошууч Н.Өнөрбатаар ахлуулсан аврагч, шүхэрчин-аврагч, химичин-аврагч, нохой сургагч, эмч зэрэг 20 алба хаагч, Балу, Марта дуудлагатай 2 эрэлч нохойтойгоор оролцож байгаа бөгөөд гамшгийн голомтод хот дотор эрэн хайх, аврах үүргийг гүйцэтгэх юм. Энэ ажиллагаа нь Үндэсний аврах бригадын бие бүрэлдэхүүний хилийн чанадад үүрэг гүйцэтгэж буй 3 дахь, үүнээс хот дотор эрэн хайх, аврах ажилааны 2 дахь тохиолдол болж байгаагаараа онцлог юм.